Գլխավոր

Հովո. «Կուզենայի երկրորդական դերեր խաղալ»

Բացառիկ հարցազրույց «Սիրո պոկեր» աշխատանքային վերնագրով ֆիլմի գլխավոր հերոսի դերակատար Հովհաննես Ազոյանի հետ:

– Ի՞նչ խառնվածքի տեր է քո հերոսը:
– Այս ֆիլմում իմ կերպարը երեք տարբեր հոգեվիճակում է հայտնվում. սկզբումնա մի քիչ մոլորված ու անվստահ երիտասարդ է, հետո նրա խաղաղ կյանքում առաջ են գալիս խնդիրներ որոնք, թվում է, անելանելի վիճակի մեջ են իրեն գցում, և վերջում նա կարողանում է հավաքվել, վճռականություն դրսևորել և կարելի է ասել հերոս դառնալ:

– Սանրվածքդ պայմանավորված է սցենարով և ռեժիսորի ցանկությամբ, թե՞ քո որոշումն էր:
– Դե, ֆիլմի սկսզբում իմ խուճուճներով եմ, և ի սկզբանե հենց այդպես էլ որոշված էր, բայց վերջում սանրվածքս ոճային փոփոխության է ենթարկվում դա արդեն ըստ սցենարի և ռեժիսորի մտահղացման: Բայց ասեմ, որ այդ ոճն ինձ դուր չի գալիս, ես գերադասում եմ իմ առօրյա սանրվածքը:

– «Պահանջվում է միլիոնատեր» և «Փեսացուն կրկեսից» ֆիլմերի համեմատ, ի՞նչ նորույթ կարող է ակնկալել հանդիսատեսը:
– Սա ավելի մասշտաբային ֆիլմ է, աշխարհագրությունն ավելի լայն է և, հետևաբար, աշխատանքն էլ ավելի շատ: Եվ այստեղ իրադարձությունները միաժամանակ մի քանի ուղղությամբ են զարգանում: Նախորդ երկու ֆիլմերից ինձ առավել դուր էր եկել «Փեսացուն կրկեսից», բայց կարծում եմ, որ իր հետաքրքրությամբ այս ֆիլմը գերազանցելու է թե´ առաջին և թե° երկրորդ ֆիլմերը:

– Հումորային դերերը քեզ հեշտ են տրվում, իսկ ուրիշ ի՞նչ կերպարներ կցանկանայիր մարմնավորել:
– Ես շատ կուզենայի երկրորդական դերեր խաղալ… կարելի է ասել` իմ երազանքներից մեկն է…

– Ինչո՞վ դա կբացատրես. համաձայնվիր` տարօրինակ ցանկություն է:
– Գլխավոր դերում միշտ շատ ավելի լարված ես, և գրեթե անշեղ հետևում ես սցենարին…, իսկ երկրորդական դերում հնարավորություն ունես մի քիչ ավելի խենթ լինել ու ավել ազատ մարմնավորել քո կերպարին:


Մեկնաբանել

Ձեր էլ. փոստի հասցեն չի հրապարակվելու: Պարտադիր դաշտերը նշված են *-ով